لو فيه حد ما يعرفش ايه هو الأفرل .. الأفرول هو السترة اللي بيلبسها أي حد بينتمي للجيش اي كانت رتبته . الناس اللي عندها ارتيكاريا من أي حد بيتكلم كويس عن الجيش انا هتكلم عن الجيش من منظوري انا و ما ليش دعوة بأي حد يعني لامجلس عسكري ولا غيره هتكلم عن حاجات غيرها فيا الأفرول وعن الجانب الإنساني للجنود مش العساكر .. ايون احنا جنود مش عساكر .
* مركز التدريب :
مركز التدريب هو المكان اللي بتروح عليه اول تبقى رسميا جندي في الجيش المكان اللي بتتحول فيه من شخص مدني لشخص عسكري يعني تنسى الدلع و "العلوقية" و الترفيه و بتتحول وحده وحده لشخص بيقدر يتكيف على الحياة في أي ظروف شخض سريع التأفلم بتاكل اي أكل و بتشرب أي ميه و بتنام في اي مكان و بتتعلم كمان ان تتبع الأوامر حتى لو كانت غلط ما دامت لا تمس تلات حاجات (فلوسك ـ مهماتك ـ شرفك ) المهمات هيا الحاجات اللي بتاخدها من الجيش "اللبس" يعني . قبل ما ادخل الجيش كان نفسي ادخل سلاح المظلات كنت عايز اجرب حاجة انا متأكد انها هتغير حياتي للأبد لكن ده للأسف ما حصلش . في مركز التدريب بتتعرف تقريباً على اكتر ناس بتأثر في حياتك بعد كده لمدة مش قصيرة و بتبدأ تتعرف على " روح الأفرول الميري " حاجة كده زي روح الفانلة الحمرا أي حد لابس الأفرول ده بتحس انه اخوك حتى لو دي اول مرة تشوفه و ده لسبب واحد انك حاسس بيه و بكل اللي هو بيشوفه لو انت خجول هتنسى خجلك لو مش اجتماعي هتبقى اجتماعي جو ذكوري فعلا بتصحى الصبح تلاقي بتاع ستين دكر واقفين "بالاندر ورر" وبيتناوبوا على دخول اربع حمامات - ده إذا كان فيه ميه ـ بتقابل ناس من كل المحافظات طرق تفكير مختلفة اسلوب حياة مختلف بتتعلم ازاي تعامل كل واحد بطريقته بتسمع تصنيفات لكل الناس ده عيل سيس وده فافي وده قفل و ده صايع و ده محترم لكن عمرك ما هتسمع تصنيفك بودنك وده لأن غيرك بيسمعه بتبدأ تعمل دواير كل دايره اوسع من اللي قبلها دول اصحاب ودول معارف و دول زمايل ودل ناس مش مهم اسمائهم .
حاجة كمان مهمة بتتعلمها في مركز التدريب انك مهما حصل بينك وبين زميلك ما تدخلش معاه في خناقة لأنه هو اللي "هيشيلك لما تقع في المعركة" وهو اللي "هيحمي دهرك" انت وهو عضوين في جسم واحد .
في مركز التدريب مسكت سلاح لأول مرة في حياتي و ساعتها بس عرفت انه عدى وقت الهزار انا بقيت جندي خلاص .. احساس بالقوةغريب جدا و انت ماسك البندقية وزي ما عمنا شفيق فال انا قتلت واتقلت بتعرف انك لو فيه حرب يا قاتل يا مقتول .. في الجيش فيه شعارات كده عشان تحفز الناس منها "سلاحي جزء مني لا اتركه قط حتى اذوق الموت "
لما رجعت في اول اجازة من مركز التدريب نظرتي لحاجات كتير اتغيرت يعني مثلا لما كنت قاعد مع اصحابي وبنتكلم بس مش كالعادة انا شايف نفسي قاعد مع شوية عيال فافي عيال كل حياتها المزز و الفيس بوك حتى اللي متجوزين منهم تقريبا ده تأثير الصدمة الحضارية و نتيجة التغيير المفاجئ .
